Martxoaren amaieran, Uraren Nazioarteko Egunaren harira, Tolosako Ingurumen Zentroarekin eta herriko ikastetxeekin elkarlanean, Oria ibaiaren lehen garbiketa gauzatu zuen Tolosako Udalak. Maiatzeko lehen astean, berriz, Gipuzkoako Arrantza Federazioaren txanda izan zen, eta bigarren aldiz garbitu zuten ibaia.
Guztira, 8 metro kubiko hondakin bildu dituzte aste batean, eta 60 orduko iraupena izan dute lanek. Garbiketa lanak Napar zubi ondoko presatik Zuloaga auzora bitarteko eremuan gauzatu dituzte lanak, eta batez ere, plastikozko botilak eta supermerkatuetako karroak aurkitu dituzte ibaian. Bestalde, txakur-gorotzen poltsa ugari ere bildu dituzte.
Udalak, Arrantza Federazioaren lana eskertzeaz gain, ingurua zaintzeko deia eta gizalegez jokatzeko eskaera luzatzen dizkie herritarrei. "Erreka garbiketan bildu diren hondakinak eta sortzen ditugun hondakin guztiak dagozkien edukiontzi edo zaborrontzian utzi behar dira, eta, jakina, ez dira ibaira bota behar. Guztion ardura da ingurumena eta natura zaintzea eta errespetatzea", adierazi dute udaletik.