Tolosa CF atletismoko emakumezkoen taldeak lehendabizikoz lortu du aire libreko Euskadiko Kluben Arteko Txapelketan txapeldunorde izatea. Asteburuan izan zen lorpena, Anoetako miniestadioan. «Izugarria» izan dela azaldu dute klubetik, gogora ekarriz pista estalian emaitza hori aurreko urtean lortu zela eta dagoeneko podiumeko hirugarren postuan zenbaitetan zapaldu dutela. Denen parte hartzea «bikaina» izan zela azaldu dute klubetik, eta marka pertsonal ugari lortu zirela. Lehen postuan Atletiko San Sebastian sailkatu zen eta hirugarren Bat taldea.
Gizonezkoen taldeari dagokionez, «meritu handiko» bosgarren postua lortu zuen. «Oso ondo lehiatu ziren orokorrean eta lortutako postua talde nahiko konpentsatu bati esker izan da», azaldu dute klubetik. Gizonezkoen lehen hiru postuak Real Sociedad, Bat taldea eta Durangorentzat izan ziren. Hori horrela, beste urtebetez, arazorik gabe maila gorenean mantenduko dira Tolosa CF-ko bi taldeak.
Emaitza aipagarrienei dagokienez, lehen postua lortu zuten Maialen Muñozek 3.000 metrotan, Irati Azpilgainek luzera jauzian eta Maria Felisa Okomok pisu jaurtiketan. Bestalde, 4x100 metrotan bigarren postua eta klubeko errekorra lortu zuten Irati Azpilgainek, Nora Ituartek, Ainhoa Gibelaldek eta June Lopetegik, 49,18ko denborarekin. 4x400 metrotan ere klubeko errekorra egin zuten Ainara Lakuntzak, Paula De Juanek, Ainhoa Muruak eta Iratxe Martinek, 4.01,50ko denborarekin.