Txotxongiloen Nazioarteko Eguna ospatzen da martxoaren 21ean 2003. urtetik, eta Tolosako Topic Txotxongiloen Nazioarteko Zentroak bat egingo du aurten ere egunarekin. Hain justu, larunbaterako antolatu du Topic-ek ikuskizun bat eta tailerra, gaztetxoek nahiz helduek elkarrekin parte hartzeko.
Batetik, 18:30ean, Nautilus izenburudun ikuskizunaz gozatzeko aukera izango da. Nemo kapitaina izango da protagonista. Itsasoa da bere bizitza, eta kezkatuta dago, zabortegi bihurtzen ari direlako, eta ondorioz, arriskuan ikusten duelako. Nemok hori gertatzea saihestu nahi du, baina laguntza beharko du horretarako.
Ikuskizunaren aurretik, baina, tailer berezia ere egingo dute Topic zentroan. Familia guztiari zuzendutako hagaxka tailerra antolatu dute, 17:30ean hasita. «Bertan, hainbat belaunaldik parte hartu ahal izango dute: aitona-amonek, osaba-izebek, gurasoek eta haurrek, jakina», esan dute.
Ikuskizunaz gozatzeko sarrerak www.topictolosa.com helbidean eskuratu ahalko dira, eta tailerrean parte hartzeko,943 65 04 14 telefono zenbakira deitu beharko da. Ikuskizunaz gozatu eta lantegian parte hartu nahi dutenentzat, haurrentzako sarrera 8 eurokoa izango da, eta murriztua 7 eurokoa. Helduentzat, berriz, 10 euro balioko du sarrera ohikoak, eta murriztuak, berriz, 8 euro.