Tolosaldea IKT taldeak nagusitasunez irabazi du Gipuzkoako Kopa, bai emakumezkoetan zein gizonezkoetan. Guztira 21 igerilarik parte hartu dute taldeka jokatzen den txapelketa honetan. «Oso gustura gaude, sekulako txapelketa izan delako», esan du Nerea Pagola teknikariak. «Bietan izan gara irabazle, baina nabarmendu nahi duguna da igerilariek egin duten lana eta lortutako denborak. Igerilarien %80 edo %90ak beraien denborak hobetu dituzte, eta horregatik izan da izugarria egin dutena».
Aurten denboraldiaren prestaketa «arraro samarra» izan dela nabarmendu du Pagolak, ez zekitelako egutegia nolakoa izango zen. «Horregatik oso pozik gaude, gazteenetatik hasita beteranoetara oso maila ona eman dutelako. Erreleboetan ere hobekuntza izan da, orokorrean izan da hobekuntza, eta sekulako amaiera eman diogu neguko denboraldiari».
Hurrengo lehiaketa Espainiako Txapelketa izango da, maila absolutuan, hemendik bi asteburura. Bertan taldeko bi igerilarik parte hartuko dute, Eneko eta Maddi Barriola anai-arrebek. Enekok 100 metro eta 200 metro bizkar estiloko probetan parte hartuko du, eta Maddik 200 metro tximeleta estiloan. «Proba bakoitzean hamar onenek bakarrik parte hartu ahal dute, eta horregatik sekulako meritua dute biek, sailkatzea lortu dutelako», esan du Pagolak.