Okomok 13,35 metrorekin lortu zuen lehen postua, eta modu horretan "negu zoragarri" bati amaiera eman dio, azaldu dute klubetik. Joseba Larrauri 200 metrotan 6. izan zen aurtengo markatik gertu ibiliaz 22,38rekin. Nora Ituartek ere negu ederra egin du eta horren erakusgarri bi probatan sailkatu izana txapelketarako. 60 metrotan oso ondo atera eta gero, 20-30. metroan estropuz egin eta aukera guztiak galdu zituen finalera igarotzeko. 200 metrotan ere sailkatu zen ibartarra, baino kasu horretan Antequerako pistako 3. kale itxiak marka ona egitea zaildu zion. Halere 26 segundotik behera egitea lortu du berriro ere 25,80rekin. "Negu bikaina dudarik gabe Norarentzat", esan dute klubetik.
17 domina Euskadiko Txapelketetan
Aurreko asteburuan 16, 18 eta 20 urtez azpiko Euskadiko Txapelketak jokatu ziren, pista estalian, eta Tolosa CF-ko atletek 17 domina lortu zituzten.
Urrezko dominei dagokionez, zortzi izan ziren lortutakoak: Maria Felisa Okomok pisu jaurtiketan egin zuen, 13,44 metrorekin Euskadiko 20 urtez azpiko errekorra eginez; Teresa Ibarbiak 1.500 metrotan lortu zuen, 5.10eko markarekin; Nora Ituartek 60 metrotan, 7,75rekin; Irati Azpilgainek ere 60 metrotan, 7,85rekin; Saioa Carranzak luzera jauzian, 4,82ko markarekin; Manex Civicok 3.000 metrotan, 8.57rekin; Ane Martinek ere 3.000 metrotan, 10.46rekin; eta Saioa Rodriguezek ere 3.000 metrotan.
Zilarrezko sei domina lortu zituzten: Mikel Irastortzak 60 metro hesietan, 8,66rekin; Ander Aristik 60 metro hesietan ere, 8,88rekin; Irati Urdanozek pisu jaurtiketan, 8,78 metrorekin; Irati Azpilgainek luzera jauzian, 5,04 metrorekin; Nora Ituartek 200 metrotan, 25,40rekin; eta Josena Larraurik ere 200 metrotan, 22,54rekin.
Brontzezko dominei dagokionez, hiru lortu zituzten: Naroa Rojok 1.500 metrotan, 5.19rekin; Ander Aristik 200 metrotan, 23,97rekin; eta Jon Turradok jauzi hirukoitzean, 11,60 metrorekin.