Alpino Uzturre elkarteko Imanol Rojo iraupen eskiatzailea oso pozik azaldu da Alemanian egin den Munduko Txapelketan izan duen parte hartzearekin. Hiru probetan parte hartu du, eta hiruetan bere postu onenak hobetzen joan da. Lehenbizikoan, 30 kilometroko skiatloian 19. postua eskuratu zuen, inoiz Munduko Kopa batean izan duen posturik onena lortuz. Ondoren, 15 kilometroko skating proban 33. postuan amaitu zuen, lasterketa horretan zuen postua hobetuz. Azkeneko proba, 50 kilometrokoa klasikoa eran, atzo izan zuen, eta 18. postuan amaitu zuen, eta horrela lehen proban lortutako emaitza postu batean hobetu zuen.
Atzoko probaren ondoren, sare sozialen bitartez hitz egin zuen Rojok: “Oso oso pozik nago nola bukatu dudan Munduko Txapelketa, orain arteko posturik onena lortu dudalako azken proban. Nabarmentzekoa da hiru probetan orain arteko posturik onenak lortu ditudala. Gaur [atzo] 18. postua egitea izugarria izan da. Lasterketa guztian borrokan aritu naiz lehen hamabost postuetan sartzeko, eta lasterketaren erdira arte lehen hamarretan sartzeko lehian izan naiz”. Bestalde, Rojok eskerrak eman dizkie taldekoei, besteak beste eskiengatik, “hegan egin dute”, eta baita berari jarraitzen dioten guztiei ere.
Aurreko asteazkenean izan zuen skatineko 15 kilometroko proba tolosarrak. "Oso pozik" zegoela azaldu zion TOLOSALDEKO ATARIA-ri, egindako lasterketarengatik: "Nire postu onena da distantzia honetan, Munduko Txapelketa batean. Atzean atera nintzen, 43 dortsalarekin, eta elurra gero eta motelago zegoen, eta horregatik lasterketa oso ona egin dut eta oso gustura nago lortutakoarekin".
Alaia Juaristi, Europan
Alpino Uzturreko Alaia Juaristi azpeitiarrak parte hartu du asteburuan Frantziako Premanon-eko proban, junior mailan. Elkartetik azaldu dutenez, Juaristik “Europako errealitatearekin topo egin du... Imanol Rojok ere, 16 urterekin, horrelako egoerak ezagutu zituen”. Izan ere, 36. bukatu du proba, parte hartzaileetan azkena izanik. Hori bai, kontuan izan behar da, aurkari gehienek Juaristik baino hiru eta bi urte gehiago zituztela. “Horrelako lasterketek eskarmentua izateko balioko diote”, azaldu dute elkartetik.