Osasun krisia hasi zen unetik, honek utzi dituen eta uzten ari den ondorio ekonomikoei aurre egiteko hainbat neurri hartu ditu Tolosako Udalak. Horietako bat izan da Suspertu Tolosa kanpainaren barruan martxan jarritako bonuen kanpaina. Guztira bi kanpaina egin dira orain artean, lehena, merkataritza eta zerbitzuen sektorera bideratutakoa, abenduan amaitu zena, eta bigarrena, ostalaritza, kafetegi eta jatetxeetara bideratutakoa.
Bigarren bonuen kanpaina martxan jarri zenetik, gorabeherak izan ditu, egoeraren bilakaeraren ondorioz, eta sektorearen behartutako itxierak medio. Arrazoi horregatik, bonuak erabiltzeko epea luzatu egin zuen udalak eta beraz, oraindik ere ostalaritza bonuak dituzten herritarrek martxoaren 31a arte erabili ahal izango dituzte.