Oria ibaiak ez du ahalmenik Tolosa herrigunean ur goraldiei aurre egiteko eta horrek uholdeak eragiten ditu ur asko dagoen sasoietan. Egoera irauli ahal izateko URA agentziak uholdeei aurre egiteko lanen proiektua idazteko kontratua lizitatu du. 118.950 euroko aurrekontua dute lanek eta 8 hilabeteko epea eman dute egikaritzeko.
Azterlan hidrauliko batean oinarritutako beren eraikuntza proiektu osoa da aurkeztu beharko dena, fluxu-sekzioa handitzeko eta egungo estugunea saihesteko. Uholdeei aurre egiteko ibaiaren ibilgua zabaldu nahi dute etxebizitzek, industriak edo bestelako azpiegiturek eragindako estutzea saihesteko. Era berean, lanek udalerrian hirigintzaren garapen segurua ahalbidetuko dutela esan du agentziak.