Larreko Mahaiak bultzatuta, Gipuzkoan hainbat ekitaldi egiten ari dira egunotan, larrialdi klimatikoaren aurrean aldaketa beharrezkoa dela aldarrikatzeko. Tolosan, bizikleta martxa egin dute, hainbat mezu zabaltzeko. Jon Irastortza parte hartzaileak azaldu duenez, "daukagun pandemia hau krisi ekologiko batetik dator. Eta gaindituta dagoen eredu baten aurka ari gara, non dena porlanaz betetzen dugun, dena zikintzen dugun eta energetikoki ere erabat menpeko garen. Ekologiaren aldeko kontzientzia zabaldu nahi dugu".
Tolosatik itzulia egin dute, hainbat puntutatik pasatuz. "Ibilbide gidatu moduko bat egingo dugu. AHTa izango dugu hizpide, batetik. Iurreamendin baratza komunitarioak ikusiko ditugu. San Blasen garai batean zabortegia egon zela-eta, hortik ere pasako gara. Bestetik, Carrefour-etik ere pasa nahi dugu, elikadura eredua salatzeko", zehaztu du Irastortzak.
Gaur arratsaldean, U30 Aldaketaldia egitasmoaren mobilizazio nagusiena egingo da Donostian. 17:00etan abiatuko da Gladys Enea parketik eta Bulebarrera arteko ibilbidea osatuko dute. Beste herrietatik joateko aukera dagoela azaldu dute antolatzaileek.
Aurrera begira bi hitzaldi antolatu dituzte Tolosako kultur etxean. Horietako bat astelehenean izango da, otsailak 1, 18:30ean, Gorka Egiak emango duena kontsumo ohituren inguruan. Bestea, ostiralean, otsailak 5, Xabier Zubialdek emango duena, energia gaietan lanketa sozialaren alorrari buruzkoa.