Urritik abendura bitarte, haurrei eman zaie hitza, nola sentitu diren, itxialdiak zer suposatu duen, eskolara buelta nolakoa izan den… jasotzeko. Sentitu dutena, izan dituzten kezkak, ilusioa zerk eragin dien… aztertu eta landu zuten. Herrikide, Laskorain eta Samaniego ikastetxeetan ari dira lanketa egiten, hamar geletan guztira, aurrez aurreko saioen bitartez. Hala, gaur egun, 250 haur inguru dira Haurren Kontseiluaren parte.
Konfinamenduak emozio positiboak eta negatiboak eragin dizkie haurrei. Besteak beste, emozio positiboak eragin dizkie familiarekin egoteko izan duten denborak, anaia-arrebekin jolasteko aukera gehiago izateak, arduratsuak izan behar dutela konturatzeak, edo etorkizunera begira egoerak konponbidea izango duela pentsatzeak. Baina konfinamenduaren ondorioz musukoa erabili behar izateak, lagunekin ezin jolastu ahal izateak, familiako hainbat kiderekin ezin egoteak edo familiako norbait gaixotzeak emozio desatseginak eragin dizkie.
Keinu txikiak proposatzea
Emozio atseginak eta negatiboak identifikatuta, apirilera bitartean emozio horien lanketa egingo dute Haurren Hiria proiektuaren barruan. Horretarako, Tolosatzen prozesuaren berri emango zaie haurrei, eta keinu txikiak proposatzeko espazioak emango zaizkie, norberak, bere egunerokotasunean, martxan jarri ditzakeen ohitura onak elkarbanatu eta denen artean Tolosa hobeago lortzeko helburuarekin.
Haurrek proposatzen dituzten keinu txikiak Herri Aliantzan txertatuko dira, eta herritar guztien eskura egongo dira. Horrez gain, haurrek identifikatu dituzten beharrei aurre egiteko ekintza plana diseinatzeko bidea ere eskainiko du Haurren Hiriak, udalak gurasoei zein haurrei zuzendutako ekintzak, hitzaldiak, tailerrak... antolatuz.