Bizkaiko Santa Marinako eta Basurtuko erietxeetan txertatze prozesuan izandako irregulartasunen inguruko azalpenak eman zituen atzo, Gotzone Sagardui Osasun sailburuak, Osasun Batzordean eginiko agerraldian. Aitortu zuen "deskoordinazioa" egon zela Santa Marinako txertatze prozesuan: "Arduradun sentitzen gara deskoordinazioagatik; ni neu lehena". Agerraldian Tolosako bi kasuren berri ere eman zuen. Tolosako bi kasu horietan gauzak egoki egin direla erantsi zuen; bi dosi geratu ziren emateke, eta, horiek bota aurretik, langileei eskaini zizkieten. Igandea izanik, gerentea eta kudeaketa unitateko burua zeuden bertan eta haiek jaso zuten. Horrekin batera, gaur bertan dimisioa eman duten Debabarrenako bi karguren berri eman zuen eta esan zuen, prebentzio zerbitzuek baieztatu dutela bi karguek asistentzia lanak ere egiten dituztela, eta, beraz, horiek ere txertatu behar zituztela.
Bada TOLOSALDEKO ATARIA-k xehetasun gehiago eskatu dizkio Osasun sailari eta Tolosako bi txertaketa horiek non eta zein karguk hartu dituzten zehazteko eskatu. Baina informazio gehiagorik ez dutela emango esan du. ATARIA-k txertoa jaso duten Iurreamendi eta Uzturre zentroekin hitz egin du ere, eta bertan egoiliar eta langileek txertoa jaso dutela eta protokoloak jarraituz egin dela esan dute. Asuncion klinikako arduradunek esan diote bertan ez dutela txertaketarik izan. Tolosaldeko ESIko zuzendaritzarekin hitz egiten ere saiatu da ATARIA, baina momentuz ez du erantzunik jaso.