Erlauntzeko produktuen erreferentziazko gunea

Bertako produktuei dagokionez, askotarikoa da eskaintza, eta baserritik lortu daitekeen guztia dute bezeroen eskura. Tartean, badira eskualdeko hornitzaileak: esnekiak (Larreta eta Mahala), arrautzak, kontserbak, olioak, haragiak (Argaia Goena baserria), sagardoak (Aburuza, Izeta...), ardoak... «Bertako produktuak sustatu nahi ditugu, bertako ekoizleekin lan eginez, kontzientzia sortuz, txikitasuna balioan jarriz eta prezioekin jokatuz», dio Altunak.

Baina ezin dugu ahaztu eztiak jarraitzen duela dendako produktu izarra izaten. Horrez gain, polena, propolia, erregina jalea edota argizaria saltzen dituzte. Jon Etxeberria erlezain ataundarra da bertako hornitzaileetako bat. «Eztia ez da ogia», dio. «Ogia, egunerokotasunean behar dugu, eta gizartean indar handia duen elikagaia da; eztia, berriz, ez horrenbeste. Horregatik, lurralde mailan, erreferentziazko denda bat da BIZZIZ, zu bilatzen ari zaren hori bermatzen duelako, aukera ugari dituelako, eta kalitatezkoak, noski», gehitzen du.

Apiterapiaren eta erlezaintzaren sustatzaileetako bat da Joxe Manuel Atxaga zizurkildarra. Behinola, esperientzia pertsonal batetik abiatuta ekin zion eta «erabat maiteminduta» sentitzen da orain. «Garrantzi ikaragarria du eztiaren ekoizpenak, eskaera-maila oso handia baita, eta hori aintzat hartu behar da», dio. «Immunitateaz horrenbeste hitz egiten den honetan, gorputza osasuntsu mantentzeko laguntzaile onenak dira erlauntzeko produktuak».

BIZZIZ dendan, gainera, alor honen inguruan dagoen nahasmenari buelta ematen saiatzen dira, bezeroak informatuz eta aholkatuz. «Ezti zale ugari egon arren, jakintza aldetik urriak dira», aitortzen du Etxeberriak. «Leku batetik zein bestetik ezti ezberdin ugari hartu ditzakete, baina ez dakite bakoitzaren atzean zer ezkutatzen den. Hori aintzat hartzen laguntzen du BIZZIZek; ezti jakin batzuei esker, bezeroaren aurreikuspenak betetzen dira».