Etxe gehienetan jaten den azken buruko bat prestatuko dugu gaurkoan: mamia. Errezeta sinplea denez, coulis batez hornituko dugu, aparteko ukitu bat emateko.
Mamiari urteen poderioz garrantzia kentzen joan gara, baina berriro ere konturatzen hasi gara zein berezia den, urteko hilabete bakar bateko produktua baita. Orain da garaia: orain dugu esnea merkatuan salgai.
Nafarroan kokatzen da euskal kutixi honen jatorria. Esnekiez egindako postreak oso ohikoak izan dira gure mahaietan baina mamiari agian ez zaio behar besteko garrantzirik eman. Idiazabal gazta batek agian toki gehiago eduki izan du gure mahaietan.
Gabonetatik hasi eta udaberria bitarte, arkumeak jaiotzen diren garaia izanda, eta ardiak ukuiluan egoten diren garaia izanik, ardi-esnea orain eskuratu daiteke.
Tolosako azokan esaterako, oraintxe eskuratu daiteke ardi esnea mamia egin ahal izateko. Gure baserritarrek azokara esne gordina ekartzen dute. Litro t'erdiko botila hiru euro t'erdian eskura daiteke, gutxi gorabehera. Beste aukera bat izan daiteke supermerkatuetan eskuratzea, baina kasu honetan esnea jada tratatuta egongo da. Esne bat edo bestea erabili, ezberdin jokatu beharko dugu.
Esne gordina erabiliz gero, egosi egin beharko dugu, postrea egiten hasi baino lehen. Ardi esnearekin kontu handiz ibili behar gara, irakiten hasten den momentuan, erabat goratu eta gainezka egiten baitu. Hortaz, kazola altu samar bat erabiltzea gomendatzen dut. Ondoren, esnea hozten utziko dugu. 30 gradu, tenperatura egokia izango da (behatza sartu eta epela sentituko dugu). Aldiz, esnea pasteurizatuta erosiz gero, epelduko dugu, aipatutako tenperatura lortu arte. Kristalezko jogurt tarroak erabili daitezke, edo buztinezkoak. Ontzi bakoitzean legami tanta batzuk botako ditugu eta jarraian esne epel hori, segituan ikusiko dugu esnea nola mamitzen den. Jarraian, hozten utziko dugu.
Azkenik, coulisarekin jarriko gara, marmelada fin-fin bat izango da, azken batean. 100/10 proportzioarekin fruta (guk fruitu gorriak aukeratu ditugu) eta azukrea, limoi tanta batzuez lagundurik egosten jarriko dugu. Marmelada testura hartzen duenean, irabiagailutik pasako dugu. Ondoren, txino batetik ere pasa dezakegu. Horrela, marmelada fin-fin bat lortuko dugu, inongo zatirik gabea. Mamia bakoitzari gainetik botako diogu coulisa. Honela gure mamiak beste gozagarririk ez luke beharko.
OSAGAIAK
Ardi esnea.
Gatzatua edo legamia.
100 gr. fruitu gorri.
10 gr. azukre.
Limoi tanta batzuk.