Urte hasieran ohikoa den moduan, Tolosaldeko Atariak bertso jaialdia antolatu du aurten ere. Tolosako Leidor aretoan izango da larunbatean, 18:00etan hasita, eta Oihana Iguaran, Maialen Lujanbio, Amets Arzallus, Andoni Egaña, Ane Labaka eta Sustrai Colina ariko dira bertsotan eta Amaia Agirrek egingo ditu gai-jartzaile lanak.
Saio berezia izango da aurtengoa egoerak eskatutako segurtasun neurri guztiak bete beharko baitira. Aforoari dagokionez gehienez 400 pertsonak jarraitu ahal izango dute saioa Leidorren bertan. Atariaren harpidedunek izan dute lehentasuna sarrerak eskuratzeko orduan. Atzo jarri ziren jaialdirako sarrerak salgai, eta azken 20 sarrera baino ez dira geratzen. Horiek bihar goizean, 10:00etatik 13:00etara eskuratu ahalko dituzte harpidedunek nahiz gainerakoek, Atariaren egoitzan bertan.