Tolosako Udal Musika Bandak kontzertua eskaini du Xexili eguna ospatzeko

Kultura segurua dela aldarrikatuz, gaur musikarion eguna ospatu dute Tolosan.

Tolosako Udal Musika Bandak kontzertua eskaini du Tolosako Plaza Zaharrean Xexili eguna ospatzeko. 12:15etan hasi da kontzertua eta bertara gerturatu diren herritarrek Tolosako Udal Txistulari Banda ere entzuteko aukera izan dute, kontzertuan parte hartu baitu. Hala ere, kontzertua hasi baino lehen Triangulo plazan, Euskal Herria plazan eta Plaza Berrian izan dira Tolosako txoko ezberdinak girotzen. Xexili egunaren ospakizunarekin batera, kultura segurua dela aldarrikatu dute musikariek.

Tolosako Udal Txistulari bandak hiru obra interpretatu ditu. Lehena, 'Menua' izenekoa, bandako kide den Mikel Zelaia Arozenak moldatutako kantua da, Golden Apple Quartet Donostiako ahots talde famatuaren buen menu kantuaren moldaketa. Bigarrena, berriz, Federico Cortoren Adan eta Eba Polka izan da. Azkenik, Jose Inazio Ansorena txistulariaren Portu kantua jo dute txistulariek. Azken hau, lau ataletako alborada bat da, eta honako erritmoak ditu: Zortzikoa, Kontrapasa, Iriyarena eta Biribilketa. Bertan, zuzendari lanetan aritu da Ion Garmendia.

Txistularien ondoren, Udal Musika Bandaren txanda izan da. Gaurkoan, lau obra interpretatu dituzte. Lehenik, Federico Chuecaren 'El Bateo' izenekoa. Chuecak 1901ean estreinatu zen El Bateo zarzuelarako konposatutako pieza da, erritmo eta melodia ezberdinetako zatiek osatzen dutena. Besteak beste, Tango de Wamba, Popurrí de Organilleros edota Polca del fotógrafo zatiak nabarmendu daitezke.

Ondoren, New Orleansera bidaiatzeko aukera eskaini dute, bertako jazz doinuekin. Bob Crosbyren 'Sauth Rampart Street Parade' kantua jo dute. Rampart Street, New Orleanseko kale bateko izena da, eta parade hitzak desfile esan nahi du. Agian, kale horretan bizi ohi den kulturari eta arnasten den musikari egin nahiko zion erreferentzia Bob Crosbyk. Nahoiro Iwai japoniar musikagile oihak egin zuen bandarako moldaketa. Alaia, bizia eta intentsitate handikoa da, tartean, flauta, klarinete eta tronpeten bakarko saioekin.

'Boutique fantasque', jostailudenda magikoa izenez ere ezaguna, balet bat da. Léonide Massinek asmatutako ekitaldi batean. Munduko estreinaldi Londresko Alhambra Antzokian izan zen 1919ko eskainaren 5ean. Can-can dantzako bi panpinen arteko maitasunaren historiari buruzkoa da jostailu-denda batean, komedia-elementuak, dantza herrikoi nazionala eta koreografia klasikoa erabiliz. Ottorino Respighik idatzi zuen bertako musika, Gloarichino Rossiniren piano piezetan oinarrituta.

Azkenik, erabat ezberdinak diren bi obra bateratuta eskaini dute. Batetik, Ludwig van Bethovennen 5. Sinfoniako doinuak, eta bestetik, Damaso Perez Pradoren Mambo number 5. Bi kantuek duten berdintasun bakarra 5 zenbakia da. Obra horretan, kubatar erritmoak antzeman dira gehien.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!