Amaitu dituzte Usabal kiroldegiko futbol zelaiko belarra aldatzeko lanak, eta herriko taldeek estreinatu dute dagoeneko zelai berria. Hilabeteko lanen ondoren, ostiralean egin zituzten ikuskaritza eta homologazio lanak, FIFA-k ezarritako parametroak betetzen direla ziurtatzeko, eta egun berean hasi ziren taldeak zelai berrituan entrenatzen.
Aurreko belar artifiziala ez zegoen egora onean, eta horregatik aldatu da belarra, bai futbol zelai nagusian, baita ondoko zati gehigarrian ere. Guztira, 192.300 euroko inbertsioa egin du udalak, herriko taldeei entrenatzeko eremu egokiagoa, eta oro har, herritarrei kirola praktikatzeko gune aproposagoa eskaintzeko helburuarekin. Behin lanak amaituta, futbol zelai parean itxita egon den bidegorri zatia ireki da berriz ere.
Herriko kirol ekipamenduak berritzeko, udala aurrera eramaten ari den plangintzan kokatzen dira Usabalgo futbol zelaiko lanak. Izan ere, hainbat izan dira azken urteetan berritu, konpondu edo egokitu diren instalakuntzak, tartean, esaterako, Uzturpeko, Berazubiko eta Beotibarko frontoiak, edo Berazubi estadioan egin diren berritze lanak: harmailak, paddle pistak, frontoia, eta bulego eta aldagela berriak, besteak beste.