Udazkenean ospatu ohi diren Tolosako auzoetako festak bertan behera utzi behar izan dituzte aurten. Horren ordez, hainbat ekintza antolatu ditu udalak auzo elkarteen laguntzarekin, Kultura Plazara lelopean. Suspertu Tolosa dinamikaren baitan, kultura sustatzeko udala egiten ari den ahaleginaren barruan kokatzen da egitasmoa.
"Udan zehar garatu den kultur programazioaren ondoren, eta udazkeneko kultur egitarauarekin batera, urriaren 9tik 12ra egingo den jaialdiarekin, kulturara gerturatzeko eta herriko artistei plaza bat emateko aukera eskaini nahi diegu herritarrei", diote udaletik. Hala, kultura sustatzen jarraitzeko eta artisten eta taldeen lana balioan jartzeko, musikak indar berezia izango duen kartela osatu da egitasmorako.
Jaialdiaren barruan antolatu diren saio guztiak zezen plazan izango dira. "Herritar guztiei irekitako eremua izan, eta kultur jardueren gune gisa indartu nahi dugu, gaur egungo egoeran, pertsonen arteko distantziak mantenduz, aire librean ekintzak egiteko gune aproposa baita", azaltzen dute udaletik. Eguraldiak lagunduko ez balu, ekitaldiak bertan behera geratuko lirateke eta beste data batzuk proposatuko lirateke ekintzak egin ahal izateko.
Jaialdiaren barruan antolatutako emanaldietarako nahitaezkoa izango da sarrerak eskuratzea. Ekintza guztiak doan izango dira, Gatiburen kontzertua izan ezik. Azken honetarako sarrerek bost euroko balioa izango dute. Eguraldi txarragatik kontzertua bertan behera geratuko balitz, sarreren dirua itzuliko litzateke. Sarrera guztiak bibe.me plataforman eskuratu ahal dira, gaurtik aurrera.
'Kultura Plazara' Egitaraua:
Urriak 9, ostirala.
- 20:00. Tolosako Musika Bandaren emanaldia
Urriak 10, larunbata.
- 20:00. Amak taldearen kontzertua
Urriak 11, igandea.
- 11:00. Ene Kantak ikuskizuna, haurrentzat.
- 20:00. Gatibu taldearen kontzertu akustikoa
Urriak 12, astelehena.
- 20:00. Pettiren kontzertua.
Bideo honetan, AMAK taldeak Villabonan eskainitako kontzertu bateko zati bat duzue. Hain justu, hainbat fandango zahar hiru minututan bilduta, euren erara.