Tolosako Udaleko Kultura sailak herriko hainbat eragile eta talderekin batera antolatu ditu kultur ekitaldiak, uda honetan, Tolosatik mugitu beharrik gabe kulturaz gozatu ahal izateko. Gaurko antolatuta zuten musika elektronikoaren inguruko Dantz Point Tolosa jaialdia, baina bertan behera geratu da chill out berezia. "Koronabirusa dela-eta, gaur egungo egoerak ez du ahalbidetzen ekitaldia beharrezko segurtasun neurriekin egitea, eta horregatik erabaki da bertan behera uztea", argitu du Tolosako Udalak.
Don Inorrez taldearen kontzertuarekin ere antzera gertatu zen. Uztailaren 18an eskaintzekoak ziren kontzertua Tolosan, baina orduan ere ezin izan zen gauzatu. Orain baina, egun berria zehaztu dute, eta Tolosan ariko da zuzenean Don Inorrez taldea, Irailaren 4an, ostiralean, 19:30ean, Tolosako Trianguloa plazan eskainiko dute. Hori bai, kontzertura joan ahal izateko nahitaezkoa izango da aurrez eta Internet bidez gonbidapena eskuratzea. 110 lagunentzako lekua prestatuko dute. Gonbidapena Internet bidez eskuratzeko arazoren bat duenak, kultur etxera jo dezake.
Derrigorrezkoa izango da kontzertura musukoarekin joatea, eta "indarrean dauden gainerako segurtasun eta prebentzio neurriak betetzea", adierazi dute udaletik, eta besteak beste, "pertsonen artean metro eta erdiko distantzia mantentzea eta eskuak garbitzea".