Tolosa C.F Pala Txapelketaren 52. edizioa da aurtengoa eta gaur (abuztuak 7) amaituko da. Uztailaren 1ean hasi zen egitasmoa eta aste honetan zehar jokatu dituzte finalaurrekoak; guztira, 23 bikote lehiatu dira txapelketan.
Emakumezkoetan, hiru bikote aurkeztu ziren eta joan etorriko partidak jokatu ondoren, Agirre eta Uzkudun kanporatuta geratu ziren. Sailkatu ziren bikoteak Rodas-Lopetegi eta Karrera-Murua izan ziren, eta horien artean jokatuko dute finala.
Gizonezkoetan, berriz, astelehenean jokatu ziren lehen finalaurrekoak. Bigarren mailan Salegi eta Zelaia sailkatu ziren Gurru eta Arrieta 30-28 garaitu ondoren. Lehen mailan, ostera, Zubiriak eta Arregik finalerako txartela lortu zuten Loidiren eta Eskuderoren aurka 30 eta 26 irabazita.
Falta ziren finalaurrekoak asteazkenean jokatu zituzten. Bigarren mailako norgehiagokan Aldazabal eta Maiza pasa ziren finalera Laso eta Beloki garaituta. 30 eta 17 tantorekin itxi zuten markagailua. Azkenik, lehen mailako finalaurrekoan Gereñu eta Zabala sailkatu ziren, 30 eta 12 hartu baitzituzten mendean Mendigain eta Laarmirni.
Finalean, beraz, hurrengo bikoteak izango dira aurrez aurre (ordena horretan):
Emakumezkoetan: Rodas-Lopetegi / Karrera-Murua.
Gizonezkoen bigarren mailan: Salegi-Zelaia / Aldazabal-Maiza.
Gizonezkoen lehen mailan: Zubiria-Arregi / Gereñu-Zabala
Jaialdia gaur arratsaldeko seietan hasiko da, Tolosako Berazubiko frontoian.