Koronabirusak eragindako itxialdia amaituta, herriko guneen azterketa egin du udalak, aisialdirako guneen erabilera zehazteko eta guneen erabilera antolatzeko. Tolosar guztiek, modu seguruan, herrian bertan udaz gozatu ahal izatea da azterketa horren helburu nagusia, jende pilaketak ekidinez eta gune ezberdinak erabiltzeko aukerarekin. Horrela, Zerkausiko terraza zabaltzeko erabakia hartu da. 09:00etatik 22:00etara egongo da irekita, eta ordutegi horretatik kanpo ezingo da bertara sartu.
Egoerak hala behartuta, prebentzio eta segurtasun neurri guztiak hartuta ireki da eremua. Jakina denez, Covid-19agatik garbiketa lanak areagotu egin dira espazio publikoetan eta Zerkausiko terraza zabaldu aurretik garbiketa plana garatu du udalak, herritar eta erabiltzaile guztien segurtasuna bermatzeko. Ondorioz, sakonki garbitu eta desinfektatu da.
Horrez gain, segurtasun gomendio orokorrak jarraitzea ezinbestekoa izango da bertan, herriko gainerako guneetan bezala. Udalak kartelak jarriko ditu jarraitu beharreko neurriekin sarrera eta irteeretan. Musukoa erabiltzea derrigorrezkoa da eta gainerako neurri guztiak errespetatzea eskatzen da.