Larratxoriak ibiliko dira, seguru,
bere etxe inguruan.
Itsasoa gauean.
Limoi usaina.
Greko demotikoz idatzitako oharrak
orrialdeen ertzetan,
euskara batua bezala kristal egoeran.
Atenasko teilatuak ez baziren
orduan ez dakit:
Parisko teilatuak izan bide ziren.
Bestela ez dakit.
Eguzkia sartzen.
Iraileko eguzki bat putzuetan.
Eta noiz itzuliko gara Hirakliora,
arantza hura kentzeko?
Noiz margotuko dugu ogi luze bat
eta ogi hori jan,
gas bihurtutako gure lagunekin?