"Sorpresa handia" hartu duela aitortu du Javier Aranak Amarotz auzoan duen kontsultara heldu denean. 28 urte luzez aritu da bertan lanean, eta auzotarrek omenaldi txiki bat egin diote azken lan egunean. Txalo artean hartu dute bertara iritsi denean, eta ondoren agurra dantzatu diote. Kontsultara sartu aurretik, eskerrak eman dizkie bertaratu direnei. Auzotarrek, gainera, opari batekin eskertu nahi izan dute Aranak egindako lana. Bertso batekin eta bere erretratu batekin atondutako koadro bat oparitu diote.
Omenaldian bertan ere parte hartu du May Gorostiaga auzoko antzerkilariak.
Amarotz Auzo Elkarteak Javier Aranari eskainitako bertsoa:
Hogeita zortzi urtetan
osasungintzako arotz,
giza altzariak osatuz
hitzak enbor, botika zotz,
arrakastaren bidetik
nahiz baliabidetan motz,
dispentsarioa etxe,
orain ilun eta laiotz,
jatorra eta hurbileko,
auzoaren begi zorrotz,
TXORTAJOle saiatua,
AUZOETXEn ez da arrotz,
Jabi, aritu zarenez,
gurekin buru eta bihotz,
guztiz eskertuta gaude
amaroztarrak ta Amarotz.