Ezohikoa, bitxia eta motza. Horrelakoa izan zen, atzo, Andre Maria plazan egindako ekitaldia. Inoiz ez zen halakorik ikusi. Kazetari eta udal langileez gain, plazan ez zegoen inor gehiago. Hutsik zegoen, eta erdian, sua. Herritar gutxi batzuk, berriz, balkoietatik su hari begira. Eta minutu gutxiren buruan, akabo. Sua itzali zen, datorren urtera arte.
22:00etan puntuan hasi ziren Garikanotarrak kanpaiak jotzen, eta une berean piztu zuten Tolosako Brigadakoek sua. Gero, Udal Txistulari Bandaren txanda izan zen, beraiek jo baitzuten San Joan zortzikoa, eta ez musika bandak. Azkenik, Olatz Peon alkateak, lore sorta bota zuen sutara, “errituen sokan, suak, gaitzak eta larriak eraman zitzan”. Alkatearekin batera, plazan izan zen ere Andu Martinez de Rituerto oposizioko kidea.