Iluntzerako leuntzear den eguzkiaren berotasunaz Iraolaeneko Basoa udako bizitza leherketa bizia, musikaren festa basoko zuhaitz bakoitzaren sustraietatik, adarrez-adar ilunabar epeleko eguzkiaren hegaletaraino zabaltzen da, harizko musika tresnen dardaraz, haize tresnen bulkadaz edo ahots doinu abegikorren besarkadaz.
Basoaren babesean euskal sustraietan abiatutako doinuetatik mundu osoko musikaren haritik bidaiatzeko gonbitea luzatzen digute, urtero Iraolaenean elkartzen diren lagunoi. Garai goibel eta arre hauetan, kultura basoa sustrai eta eguzkiaren berotasunetik elikatzen den heinean euskal kultura ere garatu ahal izan dadin, sormena, musika, eguneroko lana eta lagunartekotasunaren babesleku bihurtzen da Iraolaenea.
Et Incarnatus Orkestrak eguzki doinuaren epeltasunaz ferekatzen du Iraolaeneko Basoko zuhaitzen hosto arteko argi zipriztinen dantza. Naturaren sustraietako suaren doinu, ortziko eguzkiak besarkatzen duenean, Solstizio garaiko ur eta suak gaitzak uxatu eta gure barne izaera indarberritzeko baliatzen dugun modura, basoan gertatzen den urteroko musika leherketaren mirariaz gure arimak doinu kimuez bizteko aukera eskuzabala izatea eskertzen dugu.
