Osasun krisiaren eraginez, ia hiru hilabetez itxita egon ostean, Tolosaldeko turismo bulegoak ateak zabaldu ditu berriro. Goizez emango du jendaurreko arreta, 10:00etatik 14:00etara bitarte. Hala ere, eta orain arte moduan, zerbitzu telematikoa ere eskainiko du: WhatsApp bidez idatzi ahal izango da 943 69 74 13 zenbakira, ordutegi beraren barruan. Egoerak hobera egin ahala ordutegia zabalduz joango direla adierazi dute Tolosaldea Garatzeneko turismo sailetik.
Bisitari eta langileen segurtasuna bermatzearren, beharrezko neurriak hartu dituzte: pertsona bakarra sartu ahal izango da bulegora, gehienez ere laguntzaile batekin. Musukoa eramatea derrigorrezkoa izango da, eta bi metroko distantzia errespetatu beharko da. Gel desinfektatzailea ere eskura izango da sarreran.
Hala ere, gida eta eskuorriak ezingo ditu norberak hartu, bertako langileari eskatu beharko zaizkio. Dena den, tolosaldea.eus webgunean gida eguneratuak eskuratu daitezkeela gogoratu dute, lau hizkuntzatan (euskara, gaztelera, ingelesa eta frantsesa) bisitariak uneoro informazioa eskura izan dezan. Era berean, bulegoaren sarreran jarri dituzten informazio orrietako QR Kodeak eskaneatuz ere gidak deskargatu aukera izango da.
TURISMO SEKTOREA ERE, PREST
Jatetxe, erretegi eta tabernak, hotelak, landetxeak, museoak, dendak... Tolosaldeko turismo sektoreko eragileak ere hasiak dira ateak zabaltzen, segurtasun eta osasun neurriak biltzen dituzten protokoloak martxan jarrita. tolosaldea.eus orrialdeko blogean eskualdean zabalik diren establezimenduen zerrenda eguneratua dago eskura.
