COVID-19aren pandemiak eragindako krisi ekonomikoari aurre egiteko, Suspertu Tolosa kanpaina jarri zuen abian udalak. Herritarrek, erosketa-bonuak erosiz, herriko merkataritza eta zerbitzuen sektoreari laguntzeko aukera dute. Hasieran, 147 saltokitarako 7.000 bonu baino gehiago jarri ziren salgai.
Lehen olatua «bereziki azpimarragarria» izan zela diote. Lehen bi egunetan 1.900 bonutik gora saldu ziren. Ondorengo astebetean, berriz, bikoiztu egin zen zifra. Dagoeneko, gainera, zenbait saltokitarako ez dago bonurik. Zentzu horretan, herritarren erantzuna eskertu nahi izan du udalak, «beste behin ere konpromisoa erakusteagatik».
Udalak emandako azken datuen arabera, 4.416 bonu saldu dira, 1.700 herritarrek baino gehiagok erosi dute horietakoren bat, eta erosketa bakoitzari udalak egindako diru-ekarpena gehituta, 150.000 euroko bat-bateko inpaktu ekonomikoa sortu du. «Erantzuna paregabea izaten ari da, eta aurreikuspenak gainditzen ari dira», diote udaletik.
Ostirala izango da bonuak eskuratzeko azken eguna. Bonuak agortzear dauden honetan, herritarrei aukera aprobetxatzeko deia egiten diete.
TUTORIALAK, SALTOKIENTZAT
Bestalde, Gipuzkoako Merkatarien Federazioak, Singular Dendak proiektuaren baitan, online plataformen ezagutzan sakontzeko oinarrizko prestakuntza digitala eskaini nahi die, besteak beste, Tolosako merkatariei. Horregatik, sare sozialen oinarrizko ezagutzei buruzko sei bideo tutorial prestatu ditu. Produktuak eta zerbitzuak merkaturatzeko zein salmentak errazteko sare sozialek duten ahalmena eta eskaintzen dituzten aukerei buruzko bideoak dira, eta pandemiak sektorera ekarri dituen ondorioak arintzen laguntzea da horien helburua.