“Ekitaldi xumea bezain indartsua, sinbolikoa bezain eraginkorra”. Horrela deskribatu dute pentsionistek, gaur eguerdian, Tolosako Plaza Zaharrean egin duten elkarretaratzea. Kalitatezko bizitza eta pentsio duin baten aldeko eskubidea gauzatzea eskatzen jarraitzen dute, era guztietako aldarrikapenekin. Gaur, beharrezko segurtasun neurriak errespetatuz egin dute agerraldia. Minutu bateko isilunearekin hasi dira, eta ondoren aldarrikapenerako tartea izan dute.
“Gizartea igarotzen ari den uneak oso larriak izan arren, guk lehengo arazo berdinekin jarraitzen dugu”, diote. “Jasaten ari garen pandemia honen sorburua salatu nahi dugu, baita birusak eragindako hildakoak oroitu eta bere familiei elkartasuna adierazi ere. Bestetik, eskerrak eman nahi dizkiegu, zahar etxeetan, ospitaleetan nahiz etxeetan boluntario modura lan egin duten eta oraindik lanean jarraitzen dutenei. Azkenik, Osasun- eta menpekotasun- zerbitzu publikoei benetako erantzuna exijitu nahi diegu, egindako zoritxarreko kudeaketaren ondorio larriak zuzentzeko”.
Eskualde mailako manifestazio baterako proposamena
Ekitaldi hauek eskualde mailan antolatzen dituzte, bertako adineko pertsonen zenbait taldek. Gaur, baina, proposamen berri bat jaso dute talde horiek. “Egoera larri eta gordin honetan, argi eta garbi ikusi dugu egungo sistemak zer nolako gabeziak ekarri dizkigun. Hemen, behin eta berriro elkartu garen moduan, deialdia eskualde osoko herritar guztiei zabaltzea nahi dugu, eta ez adineko pertsonei bakarrik”.
Eskualdean gauzatzea nahi duten mobilizazio orokor bat izango dela diote. “Larunbat batean manifestazio bat egitea da proposamena. Sindikatuak, alderdi politikoak, mota guztietako langileak, borrokan zeuden eta hala jarraituko duten zaharren egoitzetakoak, irakasleak, ikasleak… guztiak elkartzea nahi dugu. Alor bakoitzak bere eskaerak defenda ditzala, pribatizazioa noraino eramaten ari diren, nola kudeatzen ari diren eta horrek zer nolako eragina duen salatzeko. Hemendik aurrera lana dugu egiteko, eta ekimen hori antolatu beharko dugu”. Proposamen hori mahai gainean jarri eta erabaki bat hartzeko konpromisoa adierazi dute taldeek.
Pozik, lan erreformaren hitzarmenarekin
Guztiak, baina ez dira albiste txarrak erretirodunentzat. “Tristura eta egoera mingarriak ematen ari diren aldi berean, balioan jarri behar dira beste hainbat kontu, esaterako, borrokatzeak merezi duela eta emaitza justuak lortzeko beti borrokatu behar dela”.
Izan ere, “pozik” daude azken asteetan Madrilen hartu den erabakiarekin, lan erreformari buruz adostutako hitzarmenarekin. “Langile klaseari azken urteetan aplikatu zaizkion murrizketa guztiak indargabetzea oso garrantzitsua da. Azken bi urteetako borrokaren eta azken greba orokorraren fruitua da hitzarmena. Erreferentzia modura hartu behar da. Horrek, ordea, ez du esan nahi lan guztia eginda dagoenik; hitzarmen hori aplikatu ahal izateko, borrokan jarraitu beharko dugulako”.
Astelehenean, berriro
Datorren astelehenean izango da hurrengo elkarretaratzea. Gaur bezala egingo dute, beraientzat “garrantzitsua” delako, ekitaldiak eskatzen dituen segurtasun eta distantzia neurriak “behar bezala betetzea. Horrela, gaurko agerraldian emandako erantzuna eskertu nahi diegu herritarrei”. Datozen asteetan ere, ahal duten neurrian, elkarretaratzeak egiten jarraituko dutela adierazi dute, bere eskubideak defendatzeko. Gauzatuko dituzten ekitaldietan, gainera, aipatutako gaien inguruan ere hitz egin eta eztabaidatuko dute.