Taldeak kantua plazaratu duenean ondorengoa adierazi du: "Asgarthen itzulera prestatzen hasi ginen unetik izan dugu buruan gure kanta klasiko bat eguneratzeko ideia eta hona hemen emaitza, konfinamendutik, etxeko distantziatik baldin bada ere".
Heriotzaren Aurpegia duela 20 urte konposatu eta grabatu zuten, zaleen abesti kuttunenetako bat bilakatu zelarik. "Gogoa genuen doinu berezi horiek berreskuratzeko, abestia lehenengoz jaio zeneko une horiek beste behin ere bizitzeko. Ederra izan da doinuei bizi berri bat ematea. Maiatzak 9a gorriz markaturiko data zen gure egutegian, pasa den larunbatean ospatu behar genuen Asgarthen itzulera Añorgako zine zaharrean, duela 13 urte agur esan genuen toki berean. COVID-19aren ondorioz, zuzeneko emanaldietako planak aldatu behar izan ditugu, eta egoerak hobera egitean iragarriko dugu itzulerako hitzordu berria. Irrikitan gaude zuek guztiokin berriz ere topo egin eta elkarrekin gozatzeko".