Covid-19ak eragindako konfinamenduaren ondorioz, Tolosako Udaleko kultur tailerrak zein Udal Musika Eskolak antolatutako hainbat ikastaro bertan behera geratu dira edo aldaketa batzuk egin behar izan dira. Ondorioz, ikastaro horiei dagokien kuoten dirua itzuli egingo du udalak.
Kultura Sailak bederatzi ikastaro antolatu ditu 2019/2020 ikasturtean zehar, iazko urrian hasi eta aurtengo ekainera arteko iraupenarekin: antzerkia, argazkigintza, dantza garaikidea, ehoziriak eta patchworka, pintura eta zeramika ikastaroak helduentzat, eta baleta eta eskulan ikastaroak haurrentzat. Martxoaren erdiaz geroztik, ordea, ez da aukerarik izan ikastaro horiek egiteko, eta ikasturtea amaitu aurretik ere ez direnez berriz martxan jarriko, epealdi honi dagokion kuotaren dirua itzuliko du udalak. Gauza bera gertatuko da Eduardo Mocoroa Udal Musika Eskolan eman ez diren ikastaroen kasuan ere.