Koronabirusak ekarritako egoeraren ondorioz, aurten Musikherria egitasmorik ez egitea erabaki da. Tolosako Udaleko Kultura Sailak eta Musikherria antolatzeko lanetan jarduten duten gainerako elkarteek eta taldeek hartu dute aurtengo edizioa bertan behera uzteko erabakia, hala nola, Tolosako Musika Eskolak, Tolosako dultzaineroek, Giro Arte taldeak, Isidro Larrañaga musika eskolak, eta Musikherriaren antolaketan parte hartzen duten gainerako eragileek.
"Gaur egungo egoerak, aurreikusitako egitaraua modu egoki batean garatzeko bermerik ez du ematen, eta horregatik erabaki da aurten Musikherria egitasmorik ez egitea", adierazi dute antolatzaileek. Tolosako musikariak eta musikazaleak batu izan ditu urtez urte Musikherria festak, herriko hainbat txoko musikarekin alaituz. "300 musikari eta abeslari inguru elkartu izan dira, egun osoko egitarau oparo batean".