Olatz Peon Tolosako alkateak adierazi duenaren arabera, larrialdi egoera ezarri aurretik, martxoaren 12an, Tolosako Udalean prebentzio mahaia osatu zuten, eta osasun krisi bat izanik, "lehen egunetik lehetasuna herritarren segurtasuna eta ongizatea bermatzea izan zen". Hala, "herritarren beharrei erantzuteko helburuarekin" kolektibo ahulenengan "arreta berezia" jarrita izan dutela gehitu du: "Lehen arrisku taldea adineko pertsonak izanik, 70 urtetik gorakoekin jarri ginen harremanetan, eta euren beharrei erantzun zaie emergentziazko taldeak eta Zaintza Sarea Tolosaren bitartez".
Bestalde, orain arte hartu dituzten neurri ekonomikoen berri ere eman du Tolosako alkateak: "Lehen neurri ekonomikoak ere hartu ditu udalak, gainerako erakundeekin koordinatuta, eta oraindik ere beste neurri batzuk lantzen bagabiltza, zergak atzeratu edota jabari publikoaren erabileragatiko tasa, esaterako". "Erakunde guztiekin elkarlanean" ari direla proposamen berriak aztertzen zehaztu du Peonek, herritarrei "erantzun integralagoa" emateko. "Gure aurrekontua krisi aurreko aurrekontua da, beraz dagoeneko bagabiltza gaur egungo egoerari erantzungo dion aurrekontua lantzen. Helburu nagusia izanik, "herritarren ongizatea bermatzeaz gain, hiri ekonomia berraktibatzea".
