Covid-19ak Haurren Hiria egitasmoan izan du eragina ere, eta gurasoekin aurreikusitako saioa bertan behera geratu zenez, Tolosako Laskorain, Samaniego eta Herrikide ikastetxeetako gazteek bideoz azaldu dizkiete gurasoei proiektuaren nondik norakoak. Gazteria saila arduratu da bertan behera geratutako saioan egin behar zuten aurkezpena bideoan jasotzeaz. Udalak esan du gurasoen ekarpenak jaso nahi dituztela eta hori dela eta tolosakohaurrenhiria@gmail.com helbidea jarri du haien eskura.
Tolosako Udalak esan duenez, Haurren Hiria proiektuaren bidez, haurren ikuspegitik herria nola bizi duten ezagutu nahi da, eta baita haurrak herritar sentiaraztea, komunitate baten parte direla ikusaraztea eta beren hitzak garrantzia duela erakustea ere. "Horretarako, Tolosan bizi diren 8-12 urteko neska-mutilei hitz egiteko eta udalgintzan parte hartzeko aukera ematen zaie egitasmo honen bidez, haurrekin elkarlanean, urtero gai ezberdinak landuz".