Koronabirusa

Kaleak desinfektatzeko lanak abiatu ditu udalak

Kale garbiketa zerbitzua indartu du udalak eta anbulatorio eta saltoki inguruak produktu desinfektatzaileekin garbitzen ari dira. Datozen egunetan, gainera, langile gehiago bideratuko dira eginkizun horietara.

Koronabirusaren zabalkundeari aurre egiteko eta kutsatzeak ekiditeko neurriak hartzen jarraitzen du udalak. Kaleak desinfektatzeko protokolo berria martxan jartzea izan da horietako bat. Une oro mantendu du kale garbiketa zerbitzua, eta hau egoera berrira egokitu da jasotako irizpideen baitan. "Udalaren eta garbiketa zerbitzua eskaintzen duen enpresaren eskutik, ahalegin berezia egin da zerbitzua egokitu eta areagotzeko", adierazi dute. 

Ur eta xaboiarekin egindako ohiko kale garbiketaz gain, pertsona gehien dabiltzan guneak ere garbituko dira produktu desinfektatzaileak erabilita, bereziki, anbulatorio ingurua eta saltoki atariak. Kaleen garbiketa eta desinfekzio lanetan gehiago sakontzeko asmoa du udalak; hori dela eta, hurrengo egunetan, langile gehiago bideratuko dituzte garbiketa eginkizunetara.

 

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!