Martxoaren 8aren bueltakoak, prest

Aurten, igandez ospatuko da Martxoaren 8a, Emakumeen Nazioarteko Eguna. Horren harira, hainbat ekintza antolatu dira Tolosan, hilaren 4tik 24ra bitarte. Tolosako Udalak, Tolosaldeko Asanblada Feministak eta eskualdeko hainbat eragile, talde eta norbanakorekin elkarlanean antolatu dute egun horren bueltako egitaraua. Besteak beste, mahai inguru bat, erakusketak, antzerki eta zinema saioak, liburu baten aurkezpena, hitzaldiak, martxa morea eta manifestazioa izango dira.

Gero eta indar handiagoa duen eguna da Martxoaren 8a, berdintasun errealaren aldeko borrokan, pisu handiagoa duena. Olatz Peon Tolosako alkateak adierazi duenez, «azken urteotako Martxoaren 8ak mugarri izan dira, indarkeria matxistaren eta desoreken aurka. Emakumeok planto egin dugu, ozen, aldarrikapenak eginez, emakume guztiok bat eginda, indarrak batuz, gure eskubideen defentsan».

Peonen esanetan, «Emakumeen Nazioarteko Eguna, orain arteko lorpenak ospatzeko eguna da, baina bereziki aldarrikapenak egitekoa, oraindik ere bide luzea dugulako egiteko berdintasunaren alde». Aldarrikapenetatik harago, «konpromisoak hartu eta berresteko eguna ere bada, berdintasunaren balioetan oinarritutako kultura eta gizartea sustatzeko, baita herri berdinzaleago bat lortzeko ere».

Ikuspegia zabaltzeko asmoa

Tolosako Udalak urteak daramatza berdintasun politikak sustatzen eta emakumeen ahalduntze pertsonalerako eta kolektiborako programa eta proiektu ezberdinak garatzen. Hala, Tolosako Udalak berdintasunarekin duen konpromisoa sendotzen jarraituko duela azpimarratu du Peonek. «Genero zeharkakotasuna barne kulturan txertatzen jarraituko dugu, politika publikoen diseinuan eta garapenean ikuspegi feminista barneratua egon dadin. Berdintasunaren, parekidetasunaren eta kontziliazioaren alde lanean jarraituko dugu, gizarte honetan, emakumeok merezi dugun eta dagokigun lekua eta errekonozimendua izan dezagun». Ikuspegi hori zabaldu eta gizarte klasearekin, adinarekin, orientazio sexualarekin, etniarekin, aniztasun funtzionalaren edota erlijioarekin lotutako ezberdintasun ezak ere landuko ditu udalak.

«Emakumeek, inolako genero mugarik gabe, haien etorkizuna erabaki eta eraikitzeko duten eskubidea» aldarrikatzen du alkateak. «Oraindik ere egiteko dugun bide hori, elkarrekin egin behar dugu, ezinbestean, emakumeok bat eginda, gizartean benetako aldaketak eragiteko eta lortzeko». Bide horretan kokatzen da aurtengo Martxoaren 8rako antolatu den egitaraua ere. Egitaraua osatzerakoan, kontuan izan dituzte Euskal Herriko V. Jardunaldi Feministan eztabaidatu eta hausnartu ziren hainbat gai.