Duela egun batzuk zabaldu zen Gipuzkoako Fiskaltzak ikerketa bat abiarazi duela Asuncion klinikan lanean ari diren medikuen egoera aztertzeko. Izan ere, atzerriko medikuak ari dira lanean bertan, baina ez dute Espainian homologatutako espezialista titulurik.
Informazio horren harira, Gipuzkoako Sendagileen Elkargo Ofizialak argitu nahi izan du ezagutzen dutela Asuncionen bizi den egoera, "elkargo honek dituen eskumenen barruan, horren jarraipena egin dugu". Era berean, Tolosako klinikan lanean ari diren mediku guztiek Espainian medikuntza homologatuko titulua dutela esan nahi izan du; "guztiak daude elkargokide gisa izena emanda, eta lege ikuspegitik, mediku gisa jardun dezakete". "Beste kontu bat da Europako Batasunetik kanpoko medikuek espezialista titulua homologatuta duten ala ez", gaineratu du.
Fiskaltza intrusismo ustezko delitu bat da ikertzen ari dena, eta horren aurrean elkargoak esan du jurisprudentzia jarraitzen duela, eta legeak dioena ere gogoratu du: "Egia da medikuntzan edo medikuntza-titulua ez duen edozein espezialitatetan diharduenak intrusismo-delitua egiten duela, kasurik larrienean. Ondorio bera, medikuntzan tituluduna izanik, titulaziorik gabeko espezialitate batean diharduenari dagokionez. Beraz, espezialitate bat legez aitortu gabe betetzen duten medikuek ez lukete intrusismo deliturik egingo".
Osasun Ministeriori dagokio
Asuncion klinikako arduradunek argitu bezala, bertan lan egiten duten medikuek euren tituluak Espainian homologatzeko zain daude. Horren harira, argitu nahi izan du homologatze hori ez dagokiola elkargoari, Osasun Ministerioari baizik. "Elkargoak hala eskatzen duten profesionalak erregistratzen ditu elkargokide gisa, medikuntzan lizentziatu tituluaren jabetzan egotea baldintza bakarra izanda", esan du.
Elkargoaren betebeharretako bat zein den azaldu du: "Mediku guztiek legea bete dezatela zaintzea da gure betebeharretako bat, erantzukizun zibileko aseguruari dagokionez, betetzen duten jardueraren araberakoa izan behar baitu; edo Espainian espezialista titulazioa homologatua ez badute, halakotzat iragarri edo aurkeztu ez daitezen zaintzea".
Bukatzeko esan du, elkargo kideen datuak publikoak direla. Gipuzkoako elkargokide medikuen datuak www.comgi.eus helbidean ikusi daitezke, eta Espainiako Estatuko elkargokideenak www.cgcom.es webgunean.