Argazki galeria

Jendetza bildu da San Blas auzoan

Josu Artutxa Dorronsoro 2020ko ots. 2a, 13:58

Atzo hasi ziren Tolosako San Blas auzoko jaiak, eta bihar, egun handia ospatzearekin batera, amaituko dira. Gaur, herri kirol saioa izan da, eta goiz guztian zehar, ez da bertsorik, ezta musikarik ere falta izan.

Eguraldi onak lagunduta, herritar asko bertaratu da San Blas auzora. Mendian buelta bat eman ondoren, edota herritik zuzenean igota joan dira gehienak. Goiztiarrenek, musika doinuak izan dituzte bertan, Udal Txistulari Bandaren eta Nekaezinak txarangaren eskutik. Ondoren, hildako auzotarren eta bazkideen aldeko meza ospatu dute.

Mezaren ondoren, herri kirol saioaren txanda izan da; Arria V. a eta Irazu aritu dira aizkoran. Hauen atzetik, Aitor Mendiluze eta Nerea Elustondo igo dira oholtzara, gaurko egunaz, aktualitateaz edota klima aldaketaz aritu dira kantuan, puntuka. Bazkal aurretik, Elustondo anai-arrebek girotu dute auzoa. Arratsaldean ere, bertsolariek eta trikitilariek bigarren saioa egingo dute, 18:30eatik aurrera.

Bihar, egun handia ospatuko dute. Goizean, meza nagusia izango da, bertako produktuen bedeinkapena eginez. Segidan, toka lehiaketa jokatuko dute. Arratsaldean, berriz, Elustondo anai-arrebena izango da festei amaiera emateko ardura.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!