Munduko bideak eskola direla, hala dio 2020. urteko Amalur jardunaldien aurkezpen testuak. Gaur bertan hasiko dira, Topic zentroko aretoan, eta Angel Lopez Soto argazkilaria izango da lehen hizlaria, Erdinomada, testigantza fotografikoa hitzaldiarekin.
Sei hizlarik osatuko dute, beste urtebetez, Amalur jardunaldien izaera, natura, bidaia eta antropologiaren ardatzean eta, gaurtik martxora bitarte, argazki kazetaritza, gizateriaren historia, erdialdeko Asia, Euskal Herritik Etiopiarako bidaia, Erroma eta bertako gastronomia, pantera arteko bizipenak nahiz Alex Txikonen espedizioak ezagutu ahal izango dituzte jardunaldietako entzuleek. Saio guztiak 19:30etik aurrera izango dira, Topic zentroan.
Argazkiak eta gizateria
Erdinomada, testigantza fotografikoa hitzaldian, Lopez Sotok bere ibilbidean barrena hartutako irudiak baliatuko ditu, munduko hainbat gatazka erakusteko. Izan ere, 1997az geroztik jarraipen bat egiten ari zaie, Txinak Tibet inbaditu ondorengo 150.000 tibetar erbesteratuei.
Horrez gain, Indiako kasta babesgabeak, Etiopiako lehorte gogorrena, Tenere basamortuko gatz karabanak nahiz Melillako muga hartuko ditu gidari. Ostiralean, berriz, Juan Luis Arsuagak eboluzioa izango du hizpide, Bizitza. Historia handia saioan.