4 eta 11 urte bitarteko haurrek erraldoiak eta buruhandiak egiteko aukera izan dute aste honetan Tolosa&Co eta Erraldoi eta Buruhandien konpartsaren eskutik. Tailerra egin dute eta haur bakoitzak bere erraldoi edo buruhandia prestatzeko aukera izan du. Aste honetako tailerra bukatzeko kalejiran atera dira. Goizean Lopez Mendizabal eta Gernikako Arbola inguruan egin dute kalejira, eta 18:00etan Alde Zaharrean ibiliko dira.
Datorren astean berriz ere egingo dituzte bai tailerra eta baita kalejirak ere; abenduaren 30, eta urtarrilaren 2an eta 3an, zehazki. Aste honetan bezala, datorrenean bi adin tartetan banatuta ariko dira haurrak; 4 eta 7 urte bitartekoak alde batetik, eta 8 eta 11 urte bitartekoak bestetik. Tailerrak goiz eta arratsaldez emango dira Erraldoi eta Buruhandien konpartsaren egoitzan, Tolosako Ferialekuan eta www.tolosandco.org webgunean eman daiteke izena.