Gabonen erdigunea bilakatu zen, iaz, Elosegi parkeko Olentzaroren Basoa, haur eta gaztetxoenen begietan. Zumardia elkarteak ibilbide magikoa prestatu zuen, Juan Kruz Igerabideren Eguberria ipuina oinarri hartu, eta neguko solstizioaren bueltako usadio eta ohiturak euskal mitologiarekin lotuz. Horrela, bigarrenez bisitatu ahal izango da, aurten, baso miresgarria, abenduaren 16tik 23ra bitarte.
Zumardia elkarteak Tolosako Udalaren laguntza izan du egitasmoan, eta Joseba Ormazabal gazteria saileko arduradunak eskerrak eman dizkio elkarteari: "Ezinbestekoa da haur, nerabe eta gazteen beharrei erantzuteko moduko jarduerak antolatzea".
Eta, behar horiei begira, Zumardiak barne hausnarketa sakon baten ondoren iragarri du aurtengo Olentzaroren Basoaren irekiera, "aspaldiko euskal usadioak, natura eta feminismoa ardatz hartuta". Basoak izango du protagonismoa, eta basoko elementu eta pertsonek; modu horretan, Olentzeroren pertsonifikaziotik aldendu nahi izan dute, eta urte sasoiaren garrantziari fokua jarri. Bide beretik, Olentzero eta Mari Domingi bikotearen irudia atzean uztea da Zumardia elkartearen helburua, Mari Domingiren bigarren planoko izaera, nahiz Olentzeroren eredu "infantilizatua" zalantzan jarriz. "Eguzkia, ura eta sua ezinbesteko izango dira Olentz-Aroa ospatzeko", eta horiek guztiak ipuin kontalariek eta aktoreek aurkeztuko dizkiete bisitariei.
Olentzero bera goratu beharrean, naturari berari egin nahi diote gorazarre eta, horrekin, Mariri; zaila dela badakiten arren, Gabon kontsumistetatik ahalik eta gehien aldentzea da epe luzerako beren buruari jarri dioten helburuetako bat.
Eguberriak bizi eta ikusteko modu hori bilduz, Juan Kruz Igerabidek Olentzaroren Basoa izeneko ipuintxo bat sortu du, Eguberria lanetik abiatuta; bisitari bakoitzari banatuko diote ipuina, opari.
Sarrerak eskuragarri
Abenduaren 5era bitarte sarrerak eskuratzeko aukera izango da, Tolosako Bidaiarien Txokoan, 17:00etatik 20:00etara, doan. Bisitak 3 eta 8 urte bitarteko haurrentzat izango dira, eta haur bakoitzarekin heldu batek joan ahal izango du. Data horien ondoren, hilaren 15era bitarte, www.zumardia.eus atarian izango dira sarrerak.
Aipatu dutenez, Zumardia elkarteak egunero bisita bat gorde du, Tolosako merkatariei, Txolarte zentroko kideei, adineko pertsonei nahiz euskara ikasten ari direnei begira.