Hainbeste (ez bakarrik politikaz) ikasi dudan pertsona ezin hobeen alboan, hainbeste urte eta dedikazioren ostean, ez da erabaki erraza izan.
Erabakiak bere baitan zekarren hauteskundeak pasa arte dimisioa ez gauzatzea, proiektuari kalterik ez egiteko. Proiektu honetan sakonki sinistu dut eta aurrerantzean hainbat kidek jarraituko duten bertan lanean.
Akatsak alde batera utzita, ez nuen danbateko batekin agurtu nahi, Elkarrekin Podemosen barruan beti egin izan dudan bezala, modu zintzo eta zainduan utzi nahi nuen egitura.
Hortaz, hauteskunde zikloa amaitu ondoren nire dimisioa gauzatu da. Harrotasunez diot Elkarrekin Podemosen parte izan naizela, baina lehen egunetik azpimarratu nuen bezala, nire leialtasuna ez da inoiz alderdi batekikoa izan, herri batekikoa eta herritarrekikoa baizik, orain eta beti.
Guzti honek ez du esan nahi politika uzten dudanik, guztia baita politika eta toki guztietan egiten baita.
Beraz, alkate bezala nahi ninduten 500 tolosarren interesen defentsan jarraituko dut, kolektibo ezberdinetatik eta bereziki Amarotzetik (munduko auzorik hoberenetik?), emozio bereziarekin.
Plazera izan da. Eskerrik asko guztioi. Elkarrekin egindako bidea tatuatuta eramango dut betirako.