Argazki galeria

Peña II.ak Promozio Mailako finala jokatuko du

Josu Artutxa Dorronsoro 2019ko urr. 27a, 19:58

22-12 irabazi dio Egiguren V.ari, Tolosako Beotibar pilotalekuan jokatu den Promozio mailako Lau Eta Erdiko Txapelketako finalerdian. Azaroaren 9an jokatuko du finala, Iruñeko Labrit pilotalekuan, Jon Alberdi azpeitiarraren aurka. 

Erabat ezberdinak izan diren bi zati izan ditu partidak. Hasieran, huts asko egin dituzte bi pilotariek. Egigurenek, gainera, 4-6 eta 5-11 aurreratzea lortu du. "Lehen zatian pisu handia nabaritu dut oinetan. Hala ere, 11-5 gindoazela, tantoa egitea lortu dut. Banekien lan egitea egokitzen zitzaidala, eta asmo horrekin jarraitu dut aurrera", esan du Peñak partida amaitu ondoren.

Hori izan da, ordea, azpeitiar gazteak izan duen alderik handiena. Ondoren, 16 tanto jarraian egitea lortu eta markagailua irauli du Peñak, meritu handiz, gainera: 21-11. "Askeago aritu naiz; sakearekin min egin diot eta errematatzean asko asmatu dut, batez ere, gantxoz", aitortu du tolosarrak. Azkenean, 22-12ko markagailuarekin, partida irabazi eta finalera sailkatzea lortu du tolosarrak. Etxean geratu da garaipena.

Bi aurrelariek, seina pilota galdu dituzte. Peñak, batez ere, hasieran galdu ditu pilota gehienak. Ondoren, ordea, erasokorrago jokatzen hasi da, eta erraz asmatzen zuen airez sartzen zen bakoitzean. Gehienak gantxoz egin baditu ere, era guztietako tantoak lortu ditu tolosarrak. Guztira, 16 egindakorekin amaitu du. Egigurenek, berriz, 6 tanto besterik ez ditu egin; guztiak lehen zatian.

Urte erdia jokatu gabe, eta finalera

Urte beltza izaten ari zen Peña. Ihauterietan lesionatu zen lehen aldiz tolosarra, eta apirilean, berriro hartu zuen min, buruz buruko txapelketako kanporaketako partida jokatzen ari zela. 6 hilabete pasatxo igaro ditu kantxetatik kanpo, sorbaldako nahiz besoko lesioengatik. Horregatik, "oso gustura" zegoen gaurko partida amaitu berritan: "Udaran lan handia egin dut, eta horrek, azkenean, fruituak ematen ditu".

Ondorioz, hirugarren aldiz jarraian jokatuko du finala Peña II.ak. Aurreko biak galdu egin zituen Agirreren eta Bakaikoaren aurka. Aurten, beraz, arantza hori kentzen ahaleginduko da. Azaroaren 9an jokatuko du txapela lortzeko norgehiagoka, Iruñeko Labrit pilotalekuan, Jon Alberdi azpeitiarraren aurka. Azpeitiarrak 22 eta 19 hartu zuen mendean, atzo, Agirre. "Atzoko partida ikusten aritu nintzen, eta Alberdik ikaragarri asmatu zuen tantoa amaitzerako garaian. Finala oso gogorra izango da". 

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!