Kluba handitzen doa

Aurtengoa denboraldi berezia da areto futboleko Tolosala kirol elkartearentzat. Hain justu, kirol elkarte moduan eratu da, orain arte zegoen gizonezko taldeari beste bi gehitu baitzaizkio: gizonezkoen bigarren taldea eta emakumezkoena. Gizonezkoen lehen taldea, Tolosala Iurre, Euskal Ligan lehiatzen da; bigarren taldea, Tolosala B, Gipuzkoako hirugarren mailan dago, eta emakumezkoen taldea, Tolosala Orbela, Gipuzkoako senior mailako ligan dago.

Kirol elkarte bihurtzea eta talde batetik hiru izatera pasatzera «erronka» izaten ari dela dio Martin Lakunza Tolosala Iurreko kideak: «Kirol elkarte izatera pasa gara, hiru talde ditugu, denbora gutxian aldaketa handia izan da, baina oso pozik gaude eta erronka bezala hartu dugu taldeak aurrera ateratzea». Tolosala proiektua orain zazpi urte hasi zen. Aurtengo denboraldian Tolosan areto futbolean jokatu nahi dutenei aukera emateko deialdia egin dute. «Batez ere zentratu ginen emakumezkoen taldea ateratzen. Horretaz gain, aukera izan dugu bigarren talde bat ateratzeko gizonezkoetan, eta bide horretatik gazte jendea animatzeko areto futbolean jokatzera».

Emakumezkoen taldeari eta bigarren taldeari dagokionez, ez diote hainbeste emaitzei begiratzen. Lehen taldeak badu aurtengorako helburu jakin bat, 3. Maila Nazionalera igotzea. Horretarako taldea «sendotu» dutela dio Lakunzak. Ioritz Otamendi billabonatarra, Aritz Lasa Laskorain taldetik eta Jon Gallurralde Anoetatik dira aurtengorako fitxaketak. «Bigarren urtea da jokatzen duguna Euskal Ligan, gehiago ezagutzen dugu, eta helburua da partida guztietan gogor jokatzea eta ahal bada mailaz igotzea». Lehen partida galdu ondoren, hurrengo biak irabazi dituzte. «Entrenamenduek bere fruitua ematen ari direla esan daiteke», azaldu du Lakunzak.