Soroaren oroimenezko binakako txapelketaren VIII. edizioa martxan da. Beotibarren pilotazale ugari elkartu ziren igandean hiru partida ikustera. Nagusien mailan Eneko Labakak eta Xabier Telletxeak 22-13 irabazi zien Xabi Zubiria eta Aratz Irazustabarrenari. Albizturko bikotea indartsu hasi zen, 8-2ko abantailarekin. Berrobitarraren eta alegiarraren susperraldia orduan iritsi zen, ordea, 9-8ra gerturatuz. Zubiriak aurrean tanto oso politak egin zituen. Beteranoak ez ziren urduri jarri eta zuzenean 18ra joan ziren, markagailua eta partida erabat euren alde jarriz.
Arratsaldeko protagonista nagusia, ordea, Unai Alberdi izan zen. Etorkizunen mailako partidan, Antton Apezetxea lagun zuela, 15 tanto egin zituen azpeitiarrak. 22-8 izan zen azken emaitza, Aitor Zabala eta Aratz Olidenen kalterako.
Jubeniletan, Iker Zubeldia-Jakes Elosegi nagusitu ziren 22-11, Iker Egiguren-Eneko Zalakainen aurka.