Beste zinema ziklo bat hastear da Tolosako Leidor aretoan, eta harekin gozatzeko gogoa dutenek, ostegun arratsaldean bonuak eskuratzeko aukera izango dute, 17:00etatik 19:00etara, aretoko leihatilan.
Besteak beste, Donostiako Zinemaldian zilarrezko maskorra irabazi duen La trinchera infinita filmaz gozatzeko aukera izango da, azaroko bigarren asteburuaren bueltan eta, zehazki azaroaren 9ko saioan, zuzendariak ere bertaratuko dira, pelikula aurkeztu eta hari buruzko solasaldia sortzera.
Ziklo berria ostegunean bertan hasiko da, eta azaroaren 14ra bitarteko filmak hartuko ditu. Horrela, 14 ikus-entzunezko proiektatuko dituzte, eta hiru izango dira haurrentzat: El Rey León, Misión Katmandú eta Pokemon. Pikachu detektibea. Azaroaren 9an, berriz, larunbatetan ezohikoa den emanaldia izango da Leidorren, 20:30eko saioarekin.
Aipaturikoekin batera, honakoak izango dira ziklo berrian ikusgai izango diren filmak: Semillas de alegría, Ad Astra, Diecisiete, El Rey Leó, La ceniza es el blanco más puro, Amazing Grace, Misión Katmandú, Vivir dos veces, Día de lluvia en Nueva York, One cut of the dead, La Trinchera Infinita, Pokemon Pikachu detektibea eta Varda por Agnés.