Joan den ostegunean Haurren Hiria proiektua aurkeztu zien, Tolosako Udalak, ikasturte honetan parte hartuko duten haurren gurasoei. 2019-2020 ikasturterako aukeratutako gaia Tolosa, denon hiria izango da, eta aterki horren azpian Lehen Hezkuntzako 3. mailatik 6. mailara bitarteko haurrak ariko dira lanean; urriaren 24an izango dute lehen saioa.
Helbururik behinena tolosar guztien beharrak kontuan hartuko dituen herria irudikatzea izango da, haurren ikuspegitik lehenik, baina baita genero ikuspegitik, migratzaileen ikuspegitik edo behar bereziak dituztenen ikuspegitik
Udalgintza gertuago
Haurren Hiria proiektuan parte hartuko duen gela bakoitzak ordezkari bat aukeratu beharko du, eta horiek osatuko dute Haurren Kontseilua. Horrela, 42 haurrek modu zuzenean parte hartuko dute proiektuan, eta horiek helaraziko diete guztia gainerako ikaskideei.
Lau saio eskola ordutan egingo dituzte, eta saio bana egingo dute, familiekin eta udal ordezkariekin.