30 bat parte hartzaile izan ditu, aurten, Berazubi auzoko txapel jaurtiketa txapelketak. Ez du bero handirik egin, baina txapela jaurtitzerakoan aurkari deserosoa bihurtu da haizea, kontran baitzuten partaideek. Hala ere, jaurtiketa onak ikusi ahal izan dira, eta zenbaitek neurria hartua zioten espezialitate bitxi honi. Aurten, bigarrenez ospatu dute Europako Txapelketa. Maiatzean, Kultur Astea ospatzen dutenean, Munduko Txapelketa jokatzen da, eta horrek ere aurten izan du bigarren edizioa.
Gaurkoan, Josetxo Otxoa izan da onena gizonezkoetan, eta Asun Mujika, emakumezkoetan. Lehenak, 15 metro eta erdira bota du txapela. Bigarren Xabi Martikorena izan da, 15,4 metroko markarekin; hirugarren, berriz, Agustin Artola, 12 metrorekin. Asun Mujikak, bestalde, 12,8 metroko marka ezarri du. Atzetik Leire Alonso sailkatu da, 12,4 metroko jaurtiketarekin. Hirugarren Lurdes Tolosa izan da; honek, 11,6 metrotara bota du txapela.
Aurrez, 6 haurrek Xake Txapelketa jokatu dute Tolosa CF plazan. Orain, paella jatea egiten ari dira bertan, eta arratsaldean, Chuchin Ibañezen kontzertua, Ritmo de Luna taldearekin areto dantzak, txistorra jatea eta arratoiaren erretzea izango dira, festei amaiera emateko.