Atzo ekin zieten Tolosako Izaskun auzoko festei. Urtero moduan, iraileko lehen asteburuan ari dira ospatzen auzoko jaiak, eta atzo danborradaren txanda izan bazen, gaur goizean haurrak izan dira protagonista ospakizunaren erdigunean. Haur eta gaztetxoen 3x3 saskibaloi txapelketa jokatu dute, eta ederki gozatu dute garai batean futbol kantxa izan zen plazan.
Arratsaldean, geroz eta arrakasta handiagoa duen sagardo dastaketa ospatuko dute, eta auzoko elkarteek pintxoak jarriko dituzte bisitarien eskura. Bihar goizean, berriz, Udaberri Dantza Taldearen emanaldiaz gain, tortila lehiaketa ere izango da.