[BABESTUTAKO EDUKIA] Hizkuntzak ikasiz

Hamaika urteko esperientzia dauka Tolosako Hizkuntza Eskola Ofizialak, eta ehunka ikaslek ikasi dute bertan frantsesa eta ingelesa. Gainera, aurten, eskaintza zabalduko dute. Zentro publikoa da, eta Paper kaleko 1. zenbakian dago.

Matrikula egiteko lehenengo epea irailaren 18ra bitarte egongo da irekita. Ingelesean, 16 urtetik gorako edozein apunta daiteke eta frantsesean 14 urtetik gorakoak. Izen-ematea Internet bidez egin behar da eta, arazorik edukiz gero, eskolarekin harremanetan jar daiteke. Ordainketa ere Interneten egin daiteke.

Aukera zabala

Ingeleseko eta frantseseko eskolak eskaintzen dituzte, A1 mailatik C1era ingelesean, eta B2.2ra frantsesean.Bi hizkuntzetan matrikula ofiziala edo librea egin daiteke. Lehenengoaren bidez, astean lau ordu eta erdiz jasotzen dira klaseak, eta maiatzean nahiz irailean egin daiteke azterketa. Bigarren matrikularen bidez, aldiz, ekaineko azterketara aurkez daitezke ikasleak.

Iaztik, klase erdi presentzialak ere badauzkate. Talde batekin hasi, eta aurten B2.2 mailako bi talde izango dira. «Harrera ona eduki dute». Horrela, ikasleek bi ordu eta laurdeneko klasea dute eta besteak Internetez landuko dituzte. «Klasera etorritakoan, irakaslearekin zalantzak argitzen dituzte, ahozkoa lantzen dute...».

Ordutegiari dagokionez, ingeleseko klaseak goizez nahiz arratsaldez jaso daitezke eta frantsesekoak arratsaldez eskaintzen dituzte.

Irakasle natiboak ere badauzkate mintzapraktika egiteko,baina ikasketan ez dira klaseetara mugatzen. Urtean behin, sagardotegian afaltzen dute irakasle natiboekin, Frantziara egun pasa joaten dira eta Tolosan bisita gidatuak egiten dituzte frantsesez eta ingelesez. Liburutegi bat ere badaukate eta liburu, CD eta DVDak eska daitezke, online edo bertara gerturatuta.

Irailaren 11n, 17:00etatik 20:00etara, ate irekiak izango dira eskolako jardueren, liburutegiaren eta multimedia gelen berri izateko, eta 18:00etan zuzeneko musika egongo da. Interesa duen edonork du bertaratzeko aukera.

 TOLOSAKO HIZKUNTZA ESKOLA