Etorkizun handiko bi euskal organista gaztek, Mikel Ansola markinarrak eta Ignacio Arakistain azpeitiarrak, Liszt, Reger, Bach, Franck eta beste batzuen obrak eskainiko dizkiete Tolosako entzuleei, 1885eko Stoltz-frères (Paris) organo erromantiko ezagunean.
Eskerrak eman dizkiete biek Musika Hamabostaldiaren antolakuntzari eta Esteban Elizondo Organo Zikloko zuzendariari; eskaini zaien aukera «paregabea» dela iritzi diote, eta jaialdian jotzea «ohorea» dela. Ansolak beren onena ematen saiatuko direla adierazi du, eta Arakistainek, berriz, kanpoko nahiz bertako musikariekin jotzea «plazera» dela, baina «etxeko musikariak» balioesten ere jakin behar dela.
Donostiako Musika Hamabostaldiko organo zikloaren barruan kokatu dute emanaldia eta Tolosako Udalak lagundu du. Sarrera doan da.