Azken denboraldian minutu gehien jokatu zituen taldekidea izan zen Julen Castañeda (Tolosa, 1990), Santanderko (Espainia) Racingen, baina klubak udazkenera begira hartu dituen erabakiak medio, tolosarra eta taldea akordio batera iritsi, eta desegin egin dute 2020ra bitarte sinatua zuten hitzarmena. 2019-2020 denboraldian Leongo (Espainia) Cultural Leonesa taldean ariko da Castañeda, Espainiako 2. B mailan.
Racing 2. mailara igo zen uda aurretik eta Castañeda jokalari garrantzitsua izan zen igoera fase horretan: guztira, 42 norgehiagoka ofizial jokatu ditu, 3.072 minutu jokatuz. Klubak, ordea, bere postuan aritzen diren bi futbolariren fitxaketa iragarri ditu berriki. Gainera, Cultural Leonesak ezker hegaleko jokalari bat behar zuen, eta lehenetsitako izenen artean zen Julen Castañedarena; gaur bertan egin dute ofizial fitxaketa berria.
Horrela, 2016ko udan hasitako ibilbidea itxi du tolosarrak Racingen, Jose Manuel Aira entrenatzailearen esanetan ariko da aurrerantzean.